संयुक्त लोकतान्त्रिक मधेसी मोर्चाको एक प्रमुख घटक मधेसी जनअधिकार फोरमले मोर्चाको आधारपत्रमा कुनै दलले सहमति नजनाए प्रतिपक्षमा बस्ने चेतावनी दिएको छ । 'आगामी १७ गतेको चुनावमा हामी तटस्थ नबस्ने भनेका छौँ, फोरम अध्यक्ष उपेन्द्र यादवले भने, 'यदि माओवादी र कांग्रेस हाम्रो मुद्दालाई लिएर गम्भीर हुँदैछनन् भने प्रतिपक्षमै बसेर संघर्षमा जान पनि सकिन्छ ।' स्वायत्त मधेस प्रदेशमा सहमति नभएमा मधेसी मोर्चा संयुक्तरुपमा संघर्षमा जाने चेतावनी दिँदै अध्यक्ष यादवले समयमै यसवारे सोच्न कांग्रेस र माओवादीलाई आग्रह गरे ।
मधेसी मोर्चाले राखेका मागहरुलाई मुख्य दलले 'बार्गेनिङ' भनेकोमा यादवले आपत्ति जनाए । 'मधेशी दलहरुले नयाँ माग र वार्गेनिङ छैन, विगतमा सरकार र हामीबीच भएका २२ बुँदे सम्झौता र आठ बुँदे सम्झौताका आधारमा मुलुक संघीयतामा गएको हो, हामीले तीनै मुद्दालाई कार्यान्वयनका लागि माग गरेका हौँ,' उनले भने, 'यदि यसैलाई 'बार्गेनिङ' भनिन्छ भने हो हामीले देश र जनताका लागि 'बार्गेनिङ' गरेका हौं । 'यादवले हालसम्म भएका राजनीतिक चलखेलहरु मुद्दाविहीन रहेकोमा यतिवेला मधेसीहरुले मुद्दामा आधारित बनाइदिएको पनि दाबी गरे ।
यादवले मधेसी मोर्चाले माओवादी र कांग्रेसलाई समानरुपमा हेरेको बताउँदै दुवै दल बराबरी हैसियतका मित्र भएको टिप्पणी गरे । उनले प्रधानमन्त्रीको उम्मेदवार उठाने दलहरुले मोर्चाको आधारपत्रबारे जवाफ नफर्काएकाले कुनै दललाई समर्थन गर्ने निर्णयमा पुग्न नसकिएको स्पष्ट पारे । 'शान्ति, संविधान र मधेसको मुद्दामा कांग्रेस र माओवादी मध्ये जसले विश्वसनीय आधिकारिक धारणा सार्वजनिक गर्छन्, उनैलाई मोर्चाले समर्थन गर्छ,' उनले भने ।
