प्रभावकारी उपचार व्यवस्था नहुँदा राजविराज कारागारमा फैलिएको भाईरल ज्वरोका विरामीको संख्या बढ्ने क्रम रोकिएको छैन । हालसम्म भाईरल ज्वरोबाट पीडित कैदी बन्दीको संख्या ६० नाघेको कारागार प्रशासनले जनाएको छ ।क्षमताभन्दा दोब्बर बढी कैदी बन्दी रहेको राजविराज कारागारमा गत सोमबारदेखि भाईरल ज्वरोको प्रकोप देखिएको थियो । विरामीको संख्या बढ्दै गएपछि कारागार प्रशासनले जिल्ला जनस्वास्थ्य कार्यालय सप्तरीलाई औषधि उपलब्ध गराईदिन आग्रह गरे पनि पर्याप्त औषधि उपलब्ध हुन नसक्दा विरामीको उपचारमा समस्या भएको छ ।राजविराज कारागारका जेलर भागवत यादवले समयमा औषधि उपलब्ध हुन नसक्दा समस्या उत्पन्न भएको बताउनु भयो । उहाँले कारागार प्रशासनले आफ्नै प्रयासबाट केही औषधि खरीद गरी विरामीहरुको प्रारम्भीक उपचार गरे पनि प्रभाबकारी हुन नसकेको बताउनुभयो ।